"Ma très-chière dame, je me recommande humblement à vous, et vous supplie pour Dieu que, actendu la division qui en présent est en sainte Eglise universal sur le fait des papes (car il i a trois contendans du papat, l'un demeure à Romme, qui se fait appeller Martin Quint, auquel tous les rois chrestiens obéissent ; l'autre demeure à Paniscole, au royaume de Valence lequel se fait appeller pape Clément VII° ; le tiers en ne seet où il demeure, se non-seulement le cardinal Saint-Estienne, et peu de gens avec lui ; lequel se fait nommer pape Benoist XIIII° le premier, qui se dit pape Martin, fut eslu à Constance par le consentement de toutes les nacions des chrestiens ; celui qui se appeller Climent fu eslu à Paniscole, après la mort de pape Benoist XIII°, par trois de ses cardinaulx ; le tiers qui se nomme Benoist XIIII° à Paniscole fu eslu secrètement, mesmes par le cardinal de Saint Estienne) ; veulliez supplier à Nostre-Seigneur Jhésucrit que, par sa miséricorde infinite, nous veulle par vous déclarier qui est des trois dessusdiz, vray Pape, et auquel plaira que on obéisse de ci en avant, ou à cellui qui se dit Martin ou à cellui qui se dit Climent, ou à cellui qui se dit Benoist ; et auquel nous devons croire, si secrètement ou par aucune dissimulation, ou publique ou manifeste car nous serons tous prestz de faire le vouloir et plaisir de Nostre-Seigneur Jhésucrit.
    Le tout vostre, conte D'ARMIGNAC."